Transcription:

أهلا بيكو في أول حلقة من برنامج كلام بالمصري، أعرفكوا بنفسي أنا أحمد علي، مقيم في في فلوريدا، بالتحديد في في أورلاندو. أنا بعمل في مجال التسويق وعندي بيسنز خاص بيا في مجال الترجمة المختص بالترجمة من عربي لإنجليزي ومن إنجليزي لعربي

طبعا خلونا نتكلم في الأول عن عن فكرة البودكاست ديت وفكرة البرنامج، وهو أن أنا عندي موقع
 Speak Egyptian -   مختص بتعليم اللهجة المصرية
الموقع دوت للناس طبعا اللي عاوزين يتعلموا اللهجة المصرية، أي حد أجنبي أو أي حد مصري بس مش عايش في مصر أو اتولد بره وعاوز يتقن اللهجة المصرية أو أن هو يسترجع مفردات اللهجة المصرية أو يتعلم ايه الجديد عن اللهجة المصرية، فأنا من خلال الموقع بحاول في وقت الفراغ إن أنا أكتب دروس أو أرفع تسجيلات أو أترجم حاجات باللهجة المصرية

ومن هنا جت فكرة البرنامج كلام بالمصري، لإن تعليم اللغة، أي لغة في العالم، أنت لازم تعرف البعد الثقافي بتاع اللغة ديت، الناس ثقافتها ايه، ايه البعد التاريخي، الخلفية الثقافية بشكل عام، وأنا الصراحة حابب أتكلم في مواضيع كتير في مختلف المجالات وفي نفس الوقت يكون دوت طريق للتواصل مع العرب أو المصريين خصوصا أنا مقيم هنا بالخارج هنا في أورلاندو، مش مقيم في مصر. فمنها تكون فرصة للحوار أو فرصة لطرح أفكار جديدة، لمناقشة مواضيع مختلفة، وفي نفس الوقت يكون حاجة كويسة لأي حد بيتعلم اللهجة المصرية أو مهتم بمصر وبأخبار مصر وبثقافة مصر بشكل عام، فالبرنامج يجمع بين الأمرين ما بين اللهجة المصرية والثقافة المصرية وفي نفس الوقت لأي حد مصري أو أي حد عربي عايز يسمع برنامج إذاعي باللغة العربية أو باللهجة المصرية فيه بتطرح مواضيع مختلقة برؤية جديدة

دي كانت مقدمة عن البرنامج، عشان كده الحلقة دي إسمها مقدمة لابد منها، أعرفكوا بالبرنامج وايه الهدف بشكل عام من البرنامج. فشكرا ليكوا وأقابلكوا المرة اللي جاية، المرة اللي جاية هتبقي حلقة عن الخلفية الثقافية أو القوة الناعمة، ودي حاجة من تجربتي هنا في أورلاندو أو في الولايات المتحدة إن ازاي الخلفية الثقافية أو البلد اللي أنت جي منها بيكون ليها أثر كبير في التعامل مع الجنسيات الأخرى، موضوع مهم جدا فأقابلكوا المرة اللي جاية في برنامح كلام بالمصري وأتمني أنكوا تكونوا دايما بخير.  سلام

Subscribe To Learn A New Word Everyday!

Learn a new word and how to pronounce it with an audio example!

You have Successfully Subscribed!

Share This